B A L A K

Ika-29 na Kinabuhi
Ni: FT

An mga kaagi nako
Kapait, Kahaylot, Kasikas
Kinabuhi na mahinongdanon
Naka sukip tanan
Kaagi na maunoron
Di gajud hikalimtan
Bisan mga mata pijong
Kagana sa kinabuhi
Unta mudugay pa
Ginoo ray nahibayu, ma.
Salamat gajud karajaw
An imo pag'anak dako
Naghatag nan kinabuhi
Di ra dako pati sa mga
Tawo na natabangan nato
Mahal ta kaw ma.

Surigao, Surigaonon, Sinurigao
Ni: FTAP
01-08-2014

Una na balak, pisi hugti
Hagit sa tuig dosmil-katursi
Surigao, Surigaonon, Sinurigao.

Marajaw gajud karajaw
Kon hingas an ipadayag, u, para klaro
Kon ngayan o pamaagi, o, para gwapo

English sanan Filipino, plastado
Spanish sanan English, hinungdan sa kahimtang
Una na sinultihan sa kuman,
   dili matukib an tinuod na sinugdanan.

Sige rakan... nilabay naman
Kuman, ato tutukan an ato sinultihan
Karajaw, Karajao, Karadjaw
   kinanghanlan mahisabtan.

An ka-islahan nan ato mahal na nasud
Kahibayo sa sinultihan gipilit na sa libro
Kita kaha, kanus-a pa?

Sa kada-eskwelahan una na sinultihan, gisugdan
Isa, duha, tuyo ka ang-ang
Gusto pa isaka, upat, lima, unom ka ang-ang

Marajaw gajud karajaw
Sigeha pa, dugangi pa, kay para mas mogana
Syete, utso, nuybe, djis

Mga nagsukit-sukit sa pag-abanti nan syagit
Dugangi pa kay para mas mogana
Unsi sanan Dusi

Kay an mga kabatan-unan
kinanghanlan nila mahibaw-an
An Karajaw, Karajao, Karadjaw
   nan kaugalingon na sinultihan

Pareho nan Sinurigao nan Surigaonon sa Surigao
Dili ikalimud nan bisan sin-o nahibayo
Marajaw gajud karajaw.

#Sumpaysabalak na Karajaw, Karajao, Karadjaw

#Kadasig gihugot sa pagsukit kabahin sa tinudlo-an gamit an una na sinultihan.

Pagpiniliay nan Lideres
Ni: FTAP

Duol na an higayon para mo botar sa nagpapili pagka lideres
An pagbotar an ato higayon para pili-on an makataronganon
An mag-abante, magderetso, o magPadajon
sa ato Marajaw Gajud Karajaw na kaugma-on.

Pili-a gajud an makataronganon na kasakto
Dumduma gajud an kaagi
Timbanga an gibuhat-nabuhat
adiser mo tuo sa ila isaad na buhat.

Karajawan nan katawhan
Lupa nan lumad
Tubig na limpyo
LIBRE na hangin, huna-hunaa, ampingi.

Basta, mga ka-botante
Ini ra an simpleh
Botar para magPadajon
an Marajaw gajud na Karajawan dinhi.

Dagko Na Mamang
Ni: FTAP

Loy ignay kaw pirmi
Sa dayan daghan posibli
Dapat listo kaw pirmi

An gamay na mamang
Sakit an pinaakan
Lawayi para mohuypa ra lamang

Pero sa dayan
An Dagko na Mamang
Makalisang kay posibli kaw maligsan

Asawa
Ni: FTAP

An imu kagwapa
Duyot sa ako huna-huna
Bisan pijong an ako mga mata
An imu kagwapa an ako makita

Salamat sa imu gugma
Bisan sa ako bukog duyot na
Unta ing-ani rata pirmi kamapayangga
Bisan matiguyang na maggupot para dili matumba

An problema normal na day
Mag-away, mag-wala, magbuyagay
Pero pagkaduyom, hibayo nakaw sa ato kantahay (toooot, ni kuya Myron T. Cubillan)
Laong pa, sige ra lamang, kay parte jaun sa paghinigugma-ay.

03/08/13, (Happy Woman's Month)

Kaanyag nan Mayag

Ni: FTAP

kon ako mahatagan nan higayon
ako isab suhitohon
an maanyag na lugar nan Mayag

limpyo an kinaiyahan sa litrato
gusto ko sab lantawon didto
kon tinuod ba an gipadayag nan litrato

gihumol nan maanyag an tiil
sa maanyag na kinaiyahan nan Mayag
kagana sab kon ako isab.

02/25/2013, Estrelleta

Kumbati
Ni: FTAP

kumbati na sila
baba ngari baba ngadto
tana amo ra adto

sa una tangke ngari
armalite bisan magkompare
panhuraw dili para makuha si kumare

punto nila an mapili
para maka silbi
sa mga botiti.

hehe

Karajaw, Karajao, o Karadjaw
Ni: FTAP

Lahi-lahi na pagkasuyat
Lahi-lahi na pagkasulti
Pero pareho ra an buot esulti ta

Sa iban mag-inalima rata
Sa iban magkinamot rata
Pero pareho ra an kalami na bati-on ta

Sa ila mao na'
Sa ato amo jaun
Pero pareho ra an tagpasabot ta

Sa iban arang kaga'hi'
Sa iban arang kahotok
Lahi-lahi an tunada pero pareho ra, mga Surigaonon ta.

Pili nan Sakto

Gasto nan Piso
Lingkod sa Trono
Kita nan Sakto

Kon gusto niju masakto
Pili nan klaro
Para wayay aboso sanan abosado

Binisaya na Sinurigao
Ni: FTAP
Usahay maglibog an utok
Lahi kuno an Binisaya
Wayay waya pero Naay Wa Ug Wala

Sulti sa bayay wayay balay
Sulti sa dayan may kuan
Pag-abot sa FB may kana naman

Siguro sa amo
An tagtudlo puro jaon sanan jadto
Waya mahilakip sa diksyonaryo an kana ug kadto

Pero laong pa ni Mama ko
Amo may ako nadak-an dinhi
Amoy ako tagtudlo sa iju

Amo ini an ato Sinurigao
Kon an ila Mao ang Maradjaw Gadjud Karadjaw
Sa ako nadak-an Marajaw Gajud Karajaw

Ya namay lain
Basta ajaw lamang kalibog
Pagmasuko kaw may J sanan W gajud.

Ako Amigo na Maisog
Ni: FTAP

Hait pa sa sundang an pansuyat
Bagtik pa sa taming an papel
Abtik pa sa eskrima an hunahuna

Tiguyang na an ako maisog na amigo
Pero pildi si Lapu-lapu sa kurso
Bisan sin-o igo sa sentido

Puro kasakto an luon sa kasing-kasing
Pati gininhawa limpyo bisan pa hinatsing
Kay sa alimpatakan an makataronganon, inamping.

Kon mo abot ako sa imu kaedaron amigo
Pangandoy ko sa imu mapareho
Tana ra amo, para sab bibo.

Sikad sa Kalingawan
Ni: FTAP

Nagsugod sa tuyo ka ligid
Kalipay abot sa langit
Tukyod ni Nanay lami pa sa tsokolit

Sa pag-eskwela sa elementarya
Sikad ngari, sikad ngadto
Piso ra an bayad sa manihero ta

Nilabay an tuig
An tuyo ka ligid
Duha rakay nagkaligid-ligid

Bayay, eskwelahan, balik-balik man
Sikad an kalingawan
Huyas nagtuyo, presko an pagpuyo.

TAMBULATA
juanmaldito

Amoy kinaham namo sauna;
Jagan diri, jagan didto...hala!
Wayay tagad kun nagkagidlay an porma;
Puko diri, puko didto, karambola!

An ayok mo singgit nan singko-dyis!
Tapok dajon, masunod an nagmando, uno-dos-tres!
Kamingaw ba lamang, pero pagka Byernes,
Pagkabibo ba lamang gikan sa iskuylahan maglumba pag-ilis.

An kinabuhi tambulata gajud;
'Mora nan nagkalukot na bayud;
Magkaguliyang kun waya pay balaud;
Pero an tanan lumalabay ra pareha nan panganod.

Sa pagtagaktak nan huyas;
Sa kasuga nan palibot an kapaso mo lagbas;
Unta amo sab ini an kabataan kuman, di mo atras;
Sa hagit nan panahon sa kasuga magjagan-magbaktas.

Hinaut makakita na sab kita jaun;
Nan mga bata sa dayan magduwa kada hapon;
Kagana ba lamang sa panahon;
Sauna, amoy ampay magduwa man dajon.

Kuman, haman baja sila makit-an?
Waya na sa Luneta sanan sa kadayanan;
Haman na gajud baja an mga kabataan kuman?
An kahamukan, jadto na sa internetan.

Kun ato timbangon an kahimtang;
Kagana sauna kay an mga ginikanan kun duyom na mag-atang;
kay an mga bigwis manguli na gikan naghampang;
Lahi na karadjaw kuman kay sa internetan magkaguliyang.
~~
 
Pagsuway, Tawhanong Kinabuhi
By: FTAP

Arang ka samok sa kalibutan
Daghan pagsuway
Daghan problema kada
segundo, minuto, oras,
adlaw, simana, buyan, tuig man

Usahay mo santop sa damgo an pagpahuway
Usahay mo santop sa alimpatakan na an tanan waya rakan
Usahay mo santop sa hunahuna na tana madaya ra sa hangin an tanan

Haaahai! an tingog sa huy-ab
para makagawas an gibati na
gikan sa layum na kahibayo

Daghan pasumbingay
Daghan ikyasanan
Daghan kinaugalingon na ilad

Tana an tanan waya rakan
Pero an tanan amoy nagpalig-on, dili kapildihan kundi
Pagsuway ra lamang sa kinabuhi na
Tawhanon, lamang.

~~

Imu Kini Adlaw Lola Doray
by: FTAP
Dumdum ko pa an imu mga mata
Samtang ikaw nag lingkod sa gawas
Nangilaya sa lumalabay ra.

An tuo na lawas
Bisan di na muhingas
Pagkakugi sa kada adlaw na pagsaka, pagnaog
Nilangtod, hangtod kuman sa handumanan.

~~

Sa Mama Ko
by: FTAP

Sa imo, daghan ko nakat-unan,
Ako nagdako sa marajaw na kaalam—
Tungod sa imu kabuotan.

Lujo sa mga kapait:
Sa mga problema,
Kalipay gihapon an imu daya

Bisan ako minyo na,
Ikaw nagpabilin na amo ra,
Sa mga marajaw na giya:
Ikaw madasigon pa.

Ampo ko para sa imo,
“Ginoo, dungga ako;
Kabaskog, Kadasig, Kaabtik, Kalig-on
Kan Mama ko i-grasya mo.”

Ma, sa simple na pamaagi
Amora ini an mabayos ko:
Salamat sa imu, para sa kinabuhi ko.

Mahal takaw ma...

~~

12:40 A. M.
By: FTAP

Una na hilak sanan ginhawa,
Kaitoooom na wait, Kayaoooot...
Kadako ini na bata bujag,
ugsa baja naglisud ako.

Good job nay, healthy imu anak
8.6lb. bujag gajud
...Salamat, dok.

Mga handumanan ni ma,
Hisgutanan na nagdasig...
Mga handumanan sa kasingkasing,
Panhitabo na ako gipasalamatan.

Ma...

~~

Imu Ra Ako--Ako Ra Kaw
Ni: FTAP

Nagmadasigon ako sa imu kagwapa.
Maampoon na sa hangtod, ikaw-ako, kita ra.
Way lain gi-pangandoy ikaw ra.

Problema nagkalata ra,
Gugma, amo ra.
Silom, Kuman, Kahapon,
Gugma na gibati pareho ra.

Bisan uno pay nangahitabo,
uno pay nahitabo,
pay mahitabo,

Dumdumon ta,
Imu Ra Ako--
Ako Ra Kaw.

~~

Surigao del Norte
by: FTAP

Hinigugma namo na probinsya,
Lupig pa an sikat na mga gingharian...
sa imu kaanyag para sa amo na imu mga Lumad.

Bisan hai na parte nan imu kinaiyahan,
Sa katawhan ngadto sa lugar...
Perpekto an imu awra sa Kinatibuk-an.

Unta mu langtod pa an imu kaanyag,
Hangtod, para sa sunod na henerasyon...
ila maamgohan an amo mga nakaplagan sa imu kuman,
makat-onan nila an amo nakat-onan sa imu kinaiyahan.

Hinigugma namo na probinsya,
Salamat sa higayon na imu kami tagpahuya...
sa imo kaanyag na lupig pa an sikat na mga gingharian,
Sa ini higayon na amo nakaplagan, kami malipayon .

Magmalamboon ka Surigao del Norte, amo hinigugma.

~~

Parang-Parang
by: FTAP

Ikaw an kinabuhi nan Surigaonon,
Kami mapasalamaton, malipayon
Sa tubig na amo na-inom... ma-inom.

Kuman ikaw gi panamastamasan
Sa mga minero na hurakab...
sa imo ka dato sa ila gikinanghanlan.

Kami na sa imu tubig
...nagkinanghanlan,
Layum na kahibayo gihisgutan,
Magamit unta sa imu kaluwasan.

Kadasig sa pakigbisog para sa imu--
Amo na gi sugdan...
Unta kami paminawan
sa kadaghanan ug kadagko-an
para sa imu kaluwasan...

Amo hinigugma na Parang-Parang.

~~

Bonggang Kalamboan Gigiyahan Mo
By: FTAP

Sa panahon nga may panabot nako,
Trade na ang gingharian nga natamakan ko,
Dako nga building, kung asa ga trabaho
ang Mama ko.

Panahon nga gutomon, sa dumdum ko:
Trade Canteen ang kasulbaran ko,
Tamya lang si Mama, human ang gutom ko.

Nilabay ang mga panahon,
Studyante na ko sa Trade:
Nahimong SurStaCT sa among panahon.

Systemang karaan anam-anam gibiyaan,
Kabag-ohan anam-anam nakaplagan,
Hangtod sa: SurStact, SSCT nalamang.

Koleheyo na, dakong gingharian gi-extensyonan,
Dako nga building sa ganghaan gi-tagdok,
Para sa nagkadakong lumad sa gingharian.

Karon, ang tanang kalamboan sa mga unang gagiya,
imo pang gihimong mas bonggang kalamboan:
Ang SSCT puhon mamahimo nang SDNSU.

Por paniguro, ang tanang lumad na
ug mamahimong mga lumad pa
sa dakong Gingharian nga imong Gigiyahan:
Mapasalamaton sa tanang Bonggang Kalamboan.

~~

Pag-umangkon Ko
By: FTAP

Sa imong pagkatawo
kami nagsadya!
Malipayon sa imong
kaambongan,
Mainampoon para sa imong
kabaskog.

Magmalambuon ka sa imong
kinabuhi!
Mahal ka namo kaayo,
hinandom sa matag-adlaw,
Pag-umangkon Ko,
nalipay kami kanimo.

~~

Inanak ko: Thirdy
By: FTAP

Mahigugmaong ina-nak ko,
Kalipay imong dala kanako,
Gakos, halok, pahiyum mo... mabulokong handumanan ko.

Sa imong adlaw nga natawhan,
Malipayon kaming tanan,
labi na ang imong buotan nga mga ginikanan.

Kabaskog, kalipay, kahibalo,
Ginoo maghatag kanimo
Daghang panahon sa pagcelibrar gi-ampo ko para kanimo...
Akong ina-nak, Thirdy.

~~

Akong Amigo(Bisaya)
By: FTAP

Happy Beerday kanimo,
Dumdum ko pa ang mga
panahong nagkauban ta:
Buyag ang atong mga wakata.

Ampo ko sa Ginoo,
"Lord, hatagi nan maayong panlawas,
daghang mauyab, daghang kwarta,
labi na ang daghang
birthday pa kining akong higala."

Amigo, mao lang kini ang
simpleng regalo ko kanimo
Balak para sa imong
importanteng adlaw.

Kon hai, ako nahandum
Sa imong karajaw.
Tagay! Sa imong
Adlaw nga Natawhan.

~~

Hangin ni Lawin
By: FTAP

Sa imo hangin...
kami nagka ising-ising,
Banda sa tuo----sa waya...
kami nagka waya-waya,
Alas Nuybe-Trise uyan ni bundak...
Kami nagka ambak-ambak.
Ginoo dunga, pahunonga na...
Si Lawin delubyo posible daya,
Ugsa, unta mawaya na sija.

~~

Naghagunos, nitaghoy...
By: FTAP

Sa pagmata sa kalangitan
Naghagunos, nitaghoy an kahanginan
Sinco minutos na kahilum, nitaghoy an kahanginan.

PAGASA ni sulti bagyo posible
Mapanganduyon mag puyo, nag puyo
Kay way mahimo, nag puyo, mag puyo

Mapanganduyon naghuna-huna
Sabado-Domingo tinglaba himuon tingeskwela
Mapanganduyon kuman mubalik na paghigda.